UN Secretary-General thar tur thlanna buaipui ṭan

United Nations Secretary-General thar thlanna buaipui ṭan a ni. Secretary-general term hnihna chelh lai, Antonio Guterrres hi a kumin Decrmber thlaah a term a zo dawn a, kum tharah chuan UN-in hruaitu thar a neih a ngai tawh dawn a ni.

Secretary-General hi member ram 193 awmna, General Assembly-in Security Council rawtna behchhanin a ruat ṭhin a ni. UN Security Council-ah hian member 15 an awm a, an zingah panga - China, France, Russia, UK Leh US chu permanent member niin veto power an nei ṭheuh bawk.

Nikum September thlaa UN General Assembly resolution-ah khan hmeichhain UN hotu ber dinhmun an la chelh ve miah loh chu pawi an tih thu sawiin, member ramte chu candidate atan hmeichia nominate tur ngaihtuah tura tih an ni. Candidate pali zingah hmeichhe candidate pahnih - United Nations High Commissioner for Human Rights Michelle Bachelet leh United Nations Conference on Trade and Development (UNCTAD) Secretary-General Rebeca Grynspan an awm ta a ni. Hmeichhe pahnihte bakah International Atomic Energy Agency (IAEA) chief Rafael Grossi leh Senegal president hlui Macky Sall ten an chuh bawk a ni.

Thla hmasa khan candidate palite hian UN member ram leh civil society-te zawhna an hmachhawn tawh a, Secretary-General ni se hmalakna tura an hmathlir leh, UN hotu ber ni tura an ṭhatna te an lo sawifiah tawh a ni. Candidate-te aṭangin Security Council chuan Secretary-General atana a rawt hi a theh lut dawn a, a rawt tur hi permanent member ram panga ten an veto lo vek bakah, member pakuain an thlawp a ngai dawn bawk a ni. Security Council-in a rawt tur a thlan vel theih chuan, General Assembly-ah vote lak a ni leh dawn a, kumin kumtawp lamah thlan fel a ni ang.