Russia-in Ukraine a beihnaah mi 27 an thi

Russia chuan Indopui II-naa Soviet Union-in Nazi Germany a hnehna champha puala May 8-9 chhunga Ukraine laka inkahhai a puan thu a sawi hnuah, inkahhai hman ṭan a nih hma ni Thawhlehni khan Ukraine kawhchhak lam nasa takin a bei leh. Russia beihnaah hian Ukraine mi 27 an thi a, hliam eng emaw zat an awm.

Ukraine foreign minister Andrii Sybiha chuan Ukraine pawhin Nilaini zanlai aṭanga inkahhai puan a rawt ve bawk a; mahse, an inremna hman ṭanna tur darkar tam pawh a awm lo tihah Russia chuan Ukraine a beihna titawp loin, a hma aia nasa zawkin bei a ni, a ti.

Russia hian drone leh missile hmangin a bei leh a, Ukraine official-te chuan an ram chhim chhak lama Zaporizhzhia khua chu nasa taka bomb niin, kumin chhunga he khawpui an beihna nasa ber a tling tih an sawi. Russia hian Poltava leh Kharkiv biala sorkar enknawl gas facility te pawh a bei tel a, thawktu mi pathum an thi a ni. Gas facility beih a nih avang hian customer 3,500 vel gas supply pawh a chhiat phah nia sawi a ni bawk.

Ukraine air force chuan Russia hian Thawhṭanni zan aṭanga bei ṭanin, ballistic missile 11 leh drone 164 a kap chhuak tih an sawi. Heng zinga missile pakhat leh drone 149 chu an lo kap thla tih sawiin, missile pariat leh drone 14 te chuan hmun 14 an kap fuh tih an sawi. Russia beihna hian chhiatna a thlen nasa hle tih an tarlang.