US-in Peshawar Consulate a khar dawn

US Department of State chuan Pakistan-a Peshawar khawpuia US Consulate General chu an palai himna atan leh, ruahmanna felfai zawk siamna turin a khar rih dawn tih nimin khan a puang.

Peshawar Consulate-a palai chu Islamabad-a US embassy-a sawn a ni dawn a, Islamabate-a embassy leh Lahore leh Karachi-a consulate-te chu dan pangngai angin hawn chhunzawm an ni thung ang.

Kumin March 1-a Israel-US ten Iran-a beihpui an thlaknaa Iran supreme leader Ayatollah Ali Khamenei a thih hnuah, Pakistan-ah hian buaina a chhuak zui a ni. Kawrachi-a US Consulate bulah Khamenei thah a nih avanga lungawi lohna lantirte leh Pakistan security force-te inkara buaina chhuakah mi pakua an lo thi tawh bawk. March 3 khan Department of State chuan Lahore leh Karachi-a an consulate-a thawk, US mi leh an chhungte chu an himna atan Pakistan chhuahsan turin a lo hriattir tawh a ni.

Department chuan thuchhuah a siamah, Pakistan rama firfiakte chetna thleng mai thei reng a ni tih sawiin, a bikin Balochistan leh Khyber Pakhtunkhwa province-ah firfiakte beihna a thleng fo tih a tarlang. Firfiakte chuan engmah sawi lawk loin an bei thut thei a, sorkar building bakah sakhaw hmun te, public transport service, hotel, mall, sipai hmun, tourist spot, school leh sorkar building-te an bitum fo tih an tarlang.