UK hmalak tur pawimawh ber EU aṭanga chhuah : Queen Elizabeth II

Britain lal, Queen Elizabeth II chuan Ningani khan Britain Parliament session thar in­khawm hmasa ber hawngin, prime minister Boris Johnson-a kaihhruai sorkar hmalak tumna hrang hrangte a sawi. 

Queen Elizabeth II chuan sorkar thar hmalak tum pawimawh ber chu European Union (EU) aṭanga Britain lakchhuah, Brexit a nih thu a sawi a ni. December 12 khan Britain parliament inthlan hi a neih a ni a,  he inthlanah hian Boris Johnson kaihhruai Conservatives Party chuan seat 650-ah seat 364 lain party malin sorkarna a siam thei a ni. Inthlan dawna a campaign au hlaah Johnson chuan Brexit tihhlawhtlin a, nakkum January thla chhung ngeia EU aṭanga an inlakchhuahna tur tihfel hman a lo tiam tawh a ni. 

Ningania Parliament inkhawm­ah hian Queen chuan Brexit chungchang bakah sorkar tharin nakkuma pass ngei a tum bill hrang hrangte a sawilang bawk. Mahse thildang zawng aiin Brexit tihhlawhtlin a nih theihna tur, Withdrawal Agreement Bill chu ngaihtuah hmasak ber a ni dawn tih a sawi. Johnson chuan Brexit deadline, January 31, 2020 chu pawhsei a tum tawh lo tih a sawi tawh bawk.