Nepal-in Mount Everest-a lawn turte tan permit a ti danglam

Kumin chhunga tlanglawn mi 11 an thih hnuah, Nepal sorkar chuan Mount Everest-a lawn turte him zawk nan tlanglawn phalna (permit) a ti danglam. 

Mount Everest-a lawn phalna pek chungchangah hian, rawtna leh inhnialna tam tak awm mah se, Nepal sorkar chuan heng a hnuaia mite hi Mount Everest-a lawn turte him zawk nana tlanglawn phalna (permit) a ti danglamna chu a ni :

1) Tlang lawn chuan Nepal-a metre 6,500 a sang a lo lawn tawh tih finfiahna a nei tur a ni. Hei hi a sawiseltute chuan neih kher a ṭulna a awm loh thu leh, a ṭangkai loh thu an sawi. 

2) Tlang lawn tur chu a hrisel ngei a ni tih finfiah a nih theih nan, medical certificate a nei tur a ni. Sawiseltute chuan medical certificate hi awlsam taka neih mai a har loh thu an tarlang. 

3) Tlang lawn tura hruaitu (guide)-te hian tlang san lawn chungchangah a tlem berah kum 3 tal sulhnu (experience) an nei tur a ni. Himalaya tlangdunga cheng Sherpa-te chuan hengte hi an tih fo ṭhin leh, an hnehsawh em em thu sawiseltute chuan an sawi bawk. 

Nepal leh China inrina Hima­laya tlangdunga awm Mount Everest hi khawvela tlangsang ber a ni a, a san zawng hi metre 8,850-a sang a ni.