ASEAN-in Myanmar Foreign Minister virtual meeting neihpui dawn

Association of Southeast Asian Nations (ASEAN) secretary general Kao Kim Hourn chuan Myanmar foreign minister chu virtual meeting neihpui an remtih thu a sawi. Myanmar hi ASEAN member a ni a, mahse, kum 2021-a sipai chakna hmanga an rama civil sorkar paihthlak a nih hnuah, an thawh hona a chhe chho hle a ni.

Philippines-a ASEAN summit neih kar laka interview a neihah, Kao Kim Hourn chuan Myanmar rama civil sorkar ding thar chuan an ram tualchhung dinhmun pawh a ziaawm tawh a, ASEAN-a member ram dangte nena an inzawmna pawh siamṭhat a duh thu a sawi a ni, a ti. Hemi rual hian a ṭhenawm ramte chuan hmasawnna awm nia sawite chu a tak ngeia hmuh an duh tih a sawi.

Sipai sorkar a din hnuah, Myanmar hi ASEAN meeting-ah kum 2021 aṭang khan an tel ve an rmti lo a ni. Mahse, ram chhung boruakin ziaawm lam a pan chhoh avangin, ASEAN foreign minister-te chuan an ram dinhmun leh hmalak dan tur chungchangah Myanmar foreign minister chu inbiakna neihpui a, virtual meeting neih an remti ta a ni. Meeting neih hun tur hi la sawi chiang lo mah se an neih thuai tur thu Kim chuan a tarlang.

Kum eng emaw chen sipai rorelna hnuaia an awm hnuah, nikum December leh kumin January thla khan Myanmar hian inthlanpui neiin, sipai thlawp party-in hnehna an chang a ni. Sipai sorkara hotu, Min Aung Hlaing chu sipai hotu ber a nihna aṭanga bangin, civil sorkar tharah hian President a ni. Hetih lai hian ASEAN chuan Myanmar ram inthlanpui neih hi a pawmpui lo thung.