IDF sipaiin Virgin Mary lim meizial zuk tir

Israel Defence Force (IDF) sipai pakhat chuan Lebanon chhim lama Kristian khua, Debel-ah Virgin Mary lim chu kuahin, mei zu ang takin a hmuiah meizial a dah. He sipai hi hriatchhuah a ni tawh a, IDF chuan hrem a ni dawn tih a tarlang.

IDF chuan sipai chet dan mawi lo tak hi kar eng maw zat kaltaa thleng tawh a ni a, mahse, Nilaini khan online-ah a darh tih an sawi. Debel khuaah vek hian Israel sipai pakhat chuan thla hmasa khan Isua lim chu a chhu chhe tawh bawk a ni.

Israel leh Lebanon helpawl, Hezbollah te inbeihna thlengah Israel sipaite hian Lebanon chhim lama cheng eng emaw zat chu insawn turin a lo ti tawh a, mahse Debel khua erawh hi chu insawnchhuak tura tih an ni ve lo. IDF chuan an sipai chet dan chu na taka an dem thu an sawi a, sakhaw tinte zalenna leh an sakhaw hmun pawimawhte chu an zah em em tih sawiin, Hezbollah nena an inbeih meknaah pawh civilian infrastructure leh sakhaw hmun pawimawhte beih tel tumna an nei lo tih an tarlang.