UK-a Labour MP-ten PM Keir Starmer bang turin nawr

Britain-a local leh regional election-a rorellai, prime minister Keir Starmer kaihhruai Conservative party an chet chhiat avangin Labour MP 70 chuang leh senior cabinet minister-te chuan PM chu bang turin an nawr.

PM bang tura nawrtu zingah hian foreign secretary Yvette Cooper leh interior minister Shabana Mahmood te bakah defence secretary John Healey leh deputy prime minister David Lammy te an tel. Inthlana Labour party an chet ṭhat loh avangin thuneihna chu mi dang kuta hlan turin an phut a ni.

Labour Party lam aṭanga bang tura nawrna awm mah se, Starmer chuan ban a tum loh thu a cabinet-te hmaah a sawi a, amah ring tawk lote chu an dik lo tih lantir turin a bei zel dawn tih a sawi. An ram chuan ro rel zel turin a beisei a, chutiang chiah chuan ro a la rel chhunzawm dawn tih a sawi a ni. Housing secretary, Steve Reed chu Starmer thlawptu lam niin, infiamna a ni lo a, rorelna fawng vuantu, prime minister thlak sek chu a tuartu mipui an ni zawk tih a sawi. Tun hun hi Prime Minister tana lungrual taka an dinho a ngaih hun a nih thu a tarlang.

England, Scotland leh Wales-a council election-ah Labour party hi an chak zo lo a, Wales Parliament-ah kum 1999 hnua a vawi khatna atan hnehna an chang zo lo a ni. MP tam takin bang turin PM hi nawr mah se, MP 100 chuang chuan Starmer hi an thlawp thu an sawi ve thung a, hruaitu inthlak hun a ni lo tih an tarlang. An party inkaihhruaina danah chuan, term zawh hmaa party hotu thlakna tur hi party MP zinga 20% in ziaka an thlawpna a lantir a ngai a ni. Starmer hi MP eng emaw zatin mi danga thlak an duh thu sawi mah se, PM duh lotute pawh hi an la inlungrual kim thei chuang lo a ni.