Beijing-ah Trump leh Xi te inbia

China tlawha zin, US president Donald Trump leh China president, Xi Jinping te chu nimin khan Beijing-ah an inbia a; Iran war chungchang bakah technology, Taiwan leh sumdawnna chungchangte an sawi dun zingah a tel.

Tun ṭum hi kum 2017-a Trump-a'n China a tlawh hnuah US President-in China ram a tlawh lehna hmasa ber a ni. Nimina an inkawmna hian darkar hnih chuang a awh a ni. An inkawmna chungchang erawh kimchanga puanzar a ni lo.

Xi hian Great Hall of the People-ah Trump hi red-carpet nen a lo dawngsawng a, military band, gun salute bakah naupangte nen an lo lawm a ni. Trump pawhin China leh USA inlaichinna chu a hma zawng aiin a ṭha chho dawn tih a sawi. Xi pawhin ram pahnihte chu hmelma ni loin, thawk dun tur an ni tih a sawi ve bawk.

Trump nena a inbiak hma hian, Xi chuan China-US inlaichinnaah Taiwan chu thil pawimawh ber a nih thu a sawi. Taiwan hian mahnia inrelbawl hran ram ni mah se, China chuan a ram chinah a ngai thung a ni. Hei vang hian ram dangten Taiwan inlaichinna an neihpui dan chu a ngaihven hle a ni. 'Taiwan chungchangah ngaihdan a in an loh chuan, ram pahnihte inkar hi a buai thei a, China-US inlaichinna pawh dinhmun ṭha lo takah a dah thei a ni," a ti. US hian China ram chauh chu pawm mah se, an ram chhung dan hnuaiah Taiwan hi a invenhimna atan ralthuam lei tir an remti a ni. Hei hi China lam chuan a ngaimawh hle. Trump chuan Taiwan hnena US ralthuam hralh chungchang pawh Xi hi a sawipui dawn tih a lo sawi lawk a ni.