New York-a a ruka Chinese police station siamtu thiam loh chantir

New York khawpuia a ruka China sorkar tana thawk a, Chinese police station siamtu, US citizen Lu Jiangwang, kum 64 mi chu New York federal court chuan thiam loh a chantir.

Lu Jiangwang hian kum 2022 kumtir lam aṭang khan China Ministry of Public Security (MPS) tan Manhattan-a police station hi a siam a ni. Hemi kum vek hian hmuh chhuah niin FBI in an chhui chian hnuah kharsak a ni. A hremna hi tihchhuah a la ni lo a, kum 30 thleng tantir theih a ni ang. He station hi Lu Jianwang hian China sorkar political agenda kalpuina atan a hmang ṭhin. China mi, China sorkar laka hel leh beitute chu an target ṭhin. Rights group chuan China sorkar hian hetiang secret police station hi ram 53-ah 100 vel a siam niin an sawi. Hei hi China sorkar laka helte vau leh thlitlai zuina atan an hmang a, hei bakah China rama democracy tundin thlawptu, tlanchhiate zawn chhuahna atan an hmang bawk.

Hetih lai hian China chuan ram dangah police station hi a din lo tih a sawi thung a, ram danga awm an mi leh sate puihna tur service station a ni zawk tih a sawi. Hri leng vanga harsatna tawkte ṭanpuina leh, driver license tinung thar turte an pui ṭhin niin a tarlang.