CIA Director-in Cuba a tlawh

US-in hun eng emaw chen Cuba ram oil chawk luhna tur a dansak tawh avanga Cuba ramin diesel leh fuel oil an tlakchham thu an sawi hnuah, Central Intelligence Agency (CIA) director John Ratcliffe chuan Ningani khan Cuba a tlawh.

Ratcliffe hian Cuba Interior Ministry-a intelligence chief, Ramon Romero Curbelo lah official dangte a hmu a ni. President Donald Trump-a'n Cuba oil lak luh tur dang a, Cuba hnena oil supply-tu ramte lakah chhiah sang tak lakah a vau hnuah ram pahnihte inkar boruak hi a ṭha lo zual hle a ni. Trump-a'n a dansak hnu hian nikum December thla aṭangin Cuba ramah hian Russia oil tanker pakhat chauh a lut tawh a, he an oil lak luh hi an hmang zo tawh tih energy ministery Vicente de la O Levy chuan an sawi a ni.

Cuba chuan Ratcliffe-a'n an ram a tlawh hian Cuba-US inkar boruak pawh a tihziawm an beisei tih sawiin, ram pahnihte inkara inhriatthiamna a awm theihna tura inbiakna pawh an neih theih an beisei tih sorkar thuchhuah chuan a tarlang. Cuba ram chu US himna tiderthawngtu a ni lo a, firfiak sponsor ramah telh tur a ni lo, a ti. US beihna leh tihchhiatna tumna emaw lam thil chu Cuba ina thlawp ngai lo thu leh, an ram aṭanga ram dang beih chu an remtih ngai dawn loh thu an tarlang.

Cuban president Miguel Diaz-Canel chuan US-in oil an lak luhna tur a dan mek chu hlip turin a ngen a, an ram mipuite harsatna an tawh mek rang taka tihziaawm theihna tur chu an dan mekna hlih emaw, thlahdul emaw a nih thu a sawi.