UK Health Secretary a bang

Britain prime minister Keir Starmer chu kar liam taa local leh regional election neih takah a kaihhruai Labour party an chet ṭhat loh avangin party chhung aṭanga bang tura nawrna chhunzawm zel a ni. Health secretary Wes Streeting chuan Ningani khan Starmer chu hruaitu turin a ring zo tawh lo tih sawiin a bang a, party hruaitu dang pawh banna thehlut an awm chhunzawm rin a ni bawk.

Streeting chuan banna lehkha a thehluhah, Stamer chuan Iran war thleng mekah Britain chu hnuk lut duh loin khawvel hmuhah an ram hmangaihna leh huaisenna a lantir a; mahse hemi rual hian hruaitu hmathlir nei ṭha an mamawh tih a sawi. Kum 2029 inthlanpui neih tur atan an party hruaitu tur candidate ṭha an neihna turin Starmer chuan a kawng a ken a ngai a ni, a ti.

Starmer hian PM aṭanga ban a tum loh thu a lo sawi tawh a; mahse Labour MP zinga hmun ngaa ṭhena hmun khat, MP 81-te an lungrual tlan chuan hruaitu thar thlang tur hian an nawr thei dawn a ni. Starmer thlaktu atana hming an sawilan zingah deputy prime minister Angela Rayner leh Great Manchester mayor Andy Burnham te an tel.

Kum 2024 inthlanah khan Starmer hoin kum 14 chhung Conservative party rorelna titawpin, Labour party chu hnehna a chanpui a ni. Mahse, a term pawh a hman zawh hmain, party chhungah an ram a kaihhruai leh rorel danah duh khawp lohna a nasa sawt hle. Streeting hma hian junior minister pali pawh an lo bang tawh bawk. Hetih lai hian senior cabinet minister tam zawkin an thlawp thung a, an ram economy dinhmun ngaihtuahin ram hruaitu inthlak hun a ni lo tih an sawi. Starmer pawhin PM a nihna aṭanga ban a tum loh thu a sawi a, amah ring tawk lote chu an tisual tih lantir ngei a tum thu a sawi a ni.