China-ah magnitude 5.2-a nain lir nghing

China chhim thlang lam, Guangxi bialah nimin zing khan magnitude 5.2-a nain lir a nghing. Lirnghingin chhiatna a thlenah mi pahnih an thi a, Liuzhou khawpuia cheng mi 7,000 chuang chu an insawn chhuak bawk.

State broadcaster, CCTV in a tarlan danin lirnghing vang hian building lian 13 a chim a, rel service a bahlah a, mahse inbiakpawhna leh power line bakah, tui leh gas supply lam erawh chu a buai phah lo tih an sawi. Chin hriat lohin mi pakhat a awm bawk a ni.

Thuneitute chuan harsatna tawkte chhanchhuah leh ṭanpui hna thawh nghal a nih thu sawiin, in chim hnuaia tangte pawh him taka lak chhuah a nih thu an tarlang. Venthawn thilah mi 7,000 chuang chu sawn chhuah an ni a, an awm lailawkna tur siamsak an ni. In chim leh chhiate chu engineer-ten nimin khan an enfiah nghal bawk. Aftershock a awm leh theih avangin in chim leh chhia awmna hnaivaiah awm lo turin thuneituten mipui an chah.

China ram chhim lamah hian lir a nghing fo a, an ram khawthlang leh khawchhak lam aiin lirnghing hi a na zawk fo a ni. Kum 2008 khan Sichuan province-ah magnitude 7.9-a nain a nghing a, mi 87,000 chuang an thi a ni.