SKorea leh Iran FM-ten Strait of Hormuz chungchang sawi dun

South Korea foreign minister, Cho Hyun chuan Pathianni khan Iran foreign minister, Seyyed Abbas Araghchi chu telephone-a biain, Middle East dinhmun a sawi pui a, tun hnaia Strait of Hormuz-a SKorea lawng beih a nih chungchang pawh a sawi lang bawk.

Minster pahnihte hian Strait of Hormuz-a South Korea lawng liante him taka an kal tlang theih dan turte an sawi dun a, lawng leh lawnga thawktute himna chungchangah inbiakna neih zel pawh an remti bawk.

May 4 khan Strait of Hormuz-a bungraw phur lawng, Panama flag inzarna HMM Namo chu kah fuh a ni a, he lawng hi South Korea shipping company, HMM enkawl a ni. Lawng kaptu hi Iran ni ngeia hriat a ni a, hemi chungchang hi South Korea pawhi an chhui chiang mek bawk. Lawng kah chhiatna lai hi siamṭhat a nih hmaa endik turin Dubai-ah team pawh a tir a ni.

South Korea foreign ministry chuan an thil chhuina aṭangin Iran chu mawhphurtu ni ngeia a lan thu a sawi a, a chhui hna hi zawhfel a nih hunah a ṭul anga hma a lak tur thu a sawi bawk. Hetih lai hian Iran chuan a tirah lawng beihnaah hian an inrawlh lo niin a sawi a, mahse, SKorea in a chhui zui hnuah sawi a nei zui tawh rih lo.

US president Donald Trump chuan SKorea lawng hi Iran in a kap ngei a ni tih sawiin, Strait of Hormuz-a lawng him taka an kaltlang theihna tura US hmalaknaah tel turin SKorea chu a sawm nghal bawk.