Starbucks Korea-in 'Tank Day' campaign vangin CEO ban

Starbucks Korea chuan 'Tank Day' campaign an siam chu Korea ram chanchina hun ṭha lo tak, kum 1980 May thlaa democracy thlawptute beih letna tura sipai sorkarin tank a tirh chungchang nen sawi zawm niin, mipui lam aṭanga sawiselna nasa tak a awm hnuah an chief executive officer Sohn Jeong-hyun an ban. An campaign kalpui pawh an sut leh nghal bawk.

Thawhṭanni khan an coffee tumbler chawilarna turin 'Tank Day' campaign hi an kalpui a ni. Starbucks Korea hian May 15 aṭang khan an tumbler series promote-na hi an kalpui a, May 26 thleng awh turin an ti a ni. Tumbler series eng emaw zat zingah Tank series hi a tel a ni. Kum 1980-a Gwangju khawpuia nawrh huaihawtte tank hmanga beih let an nih champha takah Starbucks Korea hian 'Tank Day' campaign hi a hawng a, hei hi mipui lamin an ngaithiam thei lo a ni.

Company chuan 'Tank Day' vuah chungchangah thupha chawiin,an event kalpui pawh tihtawp a nih thu leh, hetiang thil a thlen nawn tawh lohna tura hma a lak tur thu a sawi. US-a Starbucks headquarters pawhin ngaihdam dilna tichhuakin, thil thleng chu tum reng vang ni lo mah se, an thiltihin mi tam tak rilru natna a thlen chu pawi an tih thu an tarlang. Social media lamah pawh Starbucks Korea boycott tura tihna pawh a darh nasa hle.

Kum 1980, May 18 khan SKorea chhim lam, Gwangju khawpuia democracy duha nawrh huaihawtte chu hetih laia sipai sorkar, Chun Doo-hwan kaihhruai chuan sipai chakna hmangin a bei let a, pungkhawmte awmna hmunah tank-te pawh a tir a ni. Hemi hnu hian May 18 chu film leh TV show hrang hrangah SKorea ram tana ni lungchhiatthlak tiin an tarlang fo a, democracy tana ni pawimawh titein an sawi zui bawk.

Starbucks hi South Korea rama coffee chain lar ber a ni a, dawr 2,000 chuang an nei a ni. He chain-a share ngah ber chu Shinsegae group a ni. Kum 2021-ah Starbucks Coffee Company chuan share hi a hralh tawh avangin, SKorea-a an hnathawhnaa inrawlhna a nei ve tawh lo. Shinsegae group chairman Chung Yong-jin chuan Starbucks campaign-in an rama democracy a din theihna tura tuartute rilru a tihnat chungchangah insawifelna tur engmah a awm lo tiin, campaign kalpuina tura phalna pek a nih dante pawh chhui chian a nih tur thu a sawi.