Taiwan eptuten President paihthlak an tumna tlang zo lo

Taiwan-a eptu pawl, Kuomintang (KMT) leh Taiwan People's Party (TPP) in president Lai Ching-te paihthlak a nih theihna tura Parliament-a impeachment motion an put luh chuan thlawptu a ngah tawk loh avangin a tlang zo ta lo.

Democratic Progressive Party hruaitu, Lai hi nikum May thla khan Taiwan president atan lak luh a ni. Eptu party pahnihten an thunun, Parliament-ah revenue-sharing bill pass a nih hnuah, president Lai hian pawmpuina hming a ziah hnan duh loh avangin eptu party-te hian paihthlak an duh a ni. Rorellai leh eptute hi an ram danpui bawhchhiaah an inpuh tawn a ni.

Eptute chuan Lai chu 'dictator anga ro rel' tiin an puh a, DPP lam chuan KMT leh TPP chu ram pawn lam mite thawhpui a, Taiwan politics dinhmun tihbuai tumah an puh ve thung.

President aṭanga Lai paihthlak a nih theihna tura impeachment motion put luh hi Parliament member 56 in an thlawp a ni. Mahse, motion tlang tur hian Parliament-a member awm zat, 113 zinga hmun thuma ṭhena hmun hnihin an thlawp a ngai a, hei hi an tlin ta lo a ni.

Motion a tlang zawh loh hnuah, premier Cho Jung-tai chuan eptu party-te nena an ram tana thawh hona ṭha an neih theihna turin a bei zel dawn tih a sawi. Mahse, president Lai kaihhruai sorkar leh eptute hian a hma pawhin an ram venhimna tura sum sen chungchangah an lo inhmu thiam lo tawh hle bawk. Sorkarin ralthuam leina tura NT$ trillion 1.25 a rawt chu eptu lam hian hnawlin, thla eng emaw zat an innawr hnuah US ralthuam siam leina turin budget NT$ tld 780 an pass thei hram a ni.

President Lai hi Taiwan inrelbawlna leh thuneihna hran thlawptu langsar a ni a, China chu an ram dinhmun tibuaitu tiin a sawi fo. Hetih lai hian KMT hi China thlawptu a ni thung a, an party hotu Cheng Li-wun pawhin tun hnaiah China president Xi Jinping a hmu a, an ram buaina chhanah president Lai a puh ve thung.