US-in Baghdadi an luhchilh lai 'footage' tlangzarh
US Defence Department chuan Islamic State (IS) firfiak pawl hotu Abu Bakr al-Baghdadi, Syria hmar lama a awmnaa an luhchilh lai 'footage' hmasa ber a tlangzarh.
Defence Department video tlangzarh hi black-and-white niin US sipaiten kea bang sang taka hung hnan, Baghdadi chenna in an pan lai leh silai keng tu tih hriat lohten US sipaite chuanna helicopter an lo kap laite pawh hmuh tur a awm.
Baghdadi chenna in leh a chhehvel beih a nih hma leh beih a nih hnu thlalak pawh tlangzarh tel a ni bawk. US sipaite hian Inrinni liam ta khan Baghdadi chenna luhchilhin beihpui an thlak a, a tan tlanchhuahna kawng a pin tawh hnuah Baghdadi hi amah a intihlum zui a ni.
General Frank McKenzie thukhawchang
US Central Command hotupa General Frank McKenzie chuan Abu Bakr al-Baghdadi ruang chu tui hnuaiah phum a nih thu a sawi. An sipaite hian leiverhah Baghdadi hi an va nangching tih sawiin, hetah hian thihchilh bomb hmangin amah a intihlum zui a ni. A hmain naupang pathum an thi tel niin lo sawi tawh mah se pahnih zawk a nih thu a sawi bawk. Heng naupangte hi kum 12 hnuai lam hmel pu an ni.
US team-te hian Syria hmun pakhat aṭangin darkar khat vel zet helicopter hmanga an kal hnuah Baghdadi awmna hi an thleng tih a sawi bawk a, hmeichhe pali leh mipa pahnih, thihchilh bomb paite chu an inpek duh loh vangin an kaphlum bawk.
Naupang 11 chu him taka lakchhuah an ni a, documentation leh electronic thil eng emaw zat an man tih a sawi. McKenzie chuan Baghdadi chuan amah ngei a ni tih 2004-a a DNA sample an lak aṭangin a hriat theih tih a sawi bawk a ni. An hotupa ber that tawh mah se IS-te chu an hneh taah a la ngai mai lo a, hotu thar an neih thuai a ring. An chet dan a hlauhawm chhunzawm zel a ring a, phuba pawh na taka an lak ngei a ring bawk.