Dec 12-ah Britain inthlanpui nei dawn

Britain prime minister Boris Johnson-a'n inthlanpui neih hma a rawtna chu Parliament member-te chuan pawmin, December 12-ah inthlanpui an nei dawn ta. 

PM Johnson hian inthlanpui neih hma hi thla hnih dawn a buaipui hnuah, eptu pawl Labour Party lamin an dodalna chu titawpin, sorkar rawtna hi an thlawp ve ta a ni. European Union aṭanga Britain inlakchhuah tum chungchangah, EU hruaitute leh Britain PM-in inremna an siam chu MP-te chuan an pawmpui theih loh avangin dinhmun chiang lo takin an la awm chhunzawm zel. EU aṭanga inlakchhuah fel hun tura October 31 an lo bithliah pawh nakkum January thleng atan pawhsei sak an ni leh tawh bawk. 

A ṭum lina atana House of Commons-ah vote an lak dawnah, PM Johnson chuan an ram democracy chawinun a, Parliament zahawmna tundinna tur chuan kawng khat chauh an nei tawh a, chu chu inthlanpui buatsaih thuai  a ni, tiin a sawi. Inthlan nei hma rawtna chungchanga vote laknaah a thlawp lamah vote 438 tlain, a duh lo lamah vote 20 a tla.

House of Commons-a inthlan neih hma an pawmna hi House of Lords in a pawm­pui ve  leh a ngai dawn a, an pawm hnuah Parliament hi ṭhiah a ni ang.