Pakistan rel kangah mi 65 thi

Pakistan hmar lam Punjab province-ah nimin khan rel-ah kangmei a chhuak a, mi 65 an thi a, mi 45-in hliam an tuar. 

Rel kang hi Tezgam Express a ni a, Karachi aṭanga hmar lam Lahore kal tur a ni. Lahore aṭang km 400 vel a hla, Rahim Yar Khan khaw hnaih lam pana a tlan laiin kangmei hi a chhuak niin an sawi. Rel pindan pathum a kang hman a ni. 

Kangmei chhuah chhan hi passenger tu emawin gas stove chu relah hian keng lutin, zing chaw ei tur an siam lai aṭanga rawn chhuak niin thuneitute chuan an sawi. Rela gas stoves ken luh hi dan kalh a ni bawk. Railway minister Sheikh Rashid Ahmad chuan thi zingah hian Tableeghi Jamaat (Islamic zirtirtute) an tam ber thu a sawi a, Raiwind khuaa inkhawmna hmang tura kal tum an nih thu a sawi bawk. An thih chhan tam ber chu kangmei hlauh avanga rel aṭanga zuang thla an ni a, inhliam zinga mi 40 chu an dinhmun a ṭha lo hle.