China-a lungalhthei khur puakah mi 82 thi

China hmar lam, Shanxi province-a Liushenyu lungalhthei khurah karliam ta Zirtawpni khan gas a puak a, mi 82 an thi a, chin hriat lohin mi pahnih an awm bawk.

He thil thlen hun hi an ram hun zan dar 7:29 a ni a, khur chhunga gas a puah lai hian hnathawk mi 247 an awm a ni. Chhan chhuah hna thawktute tirh nghal niin, thawktu tam zawk chu chhan chhuah niin, mi 128 chu damdawi-ina enkawl an ni a, an zinga pahnih chu an dinhmun a ṭha lo hle.

President Xi Jinping chuan hliam tuarte chu theihtawpa enkawl tura a tih bakah, chin hriat loha awm mi pahnihte zawn hna pawh thawh chhunzawm zel a ni dawn tih a sawi. State Council chuan he chhiatna thleng hi chhui chian a nih tur thu leh, mawhphurtute chu na taka hrem an nih tur thu a sawi. Nimin zing khan khur chhung endik hna hi robot hmanga neih a ni.

Chhiatna thlenna hmun, Liushenyu khur hi kum 2024 khan Chinese National Mine Safety Administration chuan chhiatna hlauhawm thlen hlauhawm theihna hmun zingah a lo chhiar tel tawh a ni. He khur enkawltu, Tongzhou Group chuan nikum khan an khur enkawl dan him tawk loh vangin ṭum hnih hrem an lo tawk tawh bawk.

China ramah hian lungalhthei khura chhiatna hi a thleng fo a, mi tam takin nunna an lo chan tawh a ni. Tun hnaiah sorkarin a himna lamah dan khauh zawk a siam a, dan loa khur siamte pawh dap chhuah hna a thawk bawk. Heti chung hian chhiatna hi a la thleng fo tho a ni