Pakistan-ah sipaite chuanna rel bei

Pakistan chhim thlang lam, Balochistan province-ah nimin khan sipai chuanna rel chu bomb hmanga beih a ni a, mi 24 an thi a, hliam tuar eng emaw zat an awm.

Rel hi Quetta-a Chaman Pattak-ah a awm laiin bomb phurtu car chuan a pindan pakhat suin bomb hi a puak zui a ni. He relah hian Peshwar-a Eid holiday hmang tura kal,sipai leh an chhungte eng emaw zat an chuang a ni. Bomb puak hi a na hle a, rel pindan pahnih a let phah a, rel kawng bulhnai, meter 25-30 vela car an park pawh tam tak a kang bawk a ni.

Baloch Liberation Army (BLA) chuan bomb tipuaktu an nih thu an sawi a, BLA-a fidayee (self-sacrificing) unit Majeed Brigade chuan sipai chuanna rel chu an bei tih an tarlang a, rel beihna thlengah mawhphurhna an lak thu an puang bawk.

Balochistan province hian Iran leh Afghanistan a ri a, kum tam tak chhung chu inlakhran duhtu pawlten thuneihna sang zawk neih phutin pawikhawihna an thlen fo a ni. Security force-te bakah civil mi, infrastructure leh China-Pakistan Economic Corridor (CPEC) nena inzawmna nei project-te an bitum fo a ni.