Ebola hri vangin Canada-in khuahkhirhna siam

Canada ram chuan Ebola hri lenna, Africa ram pathum - Democratic Republic of Congo, Uganda leh South Sudan aṭanga an rama zin luh a khap. He khapna hi nimin aṭang khan hman ṭan niin, ni 90 chhung hman a ni phawt dawn tih sorkar thuchhuah chuan a tarlang.

Ebola hri leng vang hian US chuan kar liamta khan America mi ni lo, tun hnaia DRC, Uganda leh South Sudan-a zinte chu US-ah an luh a lo khap tawh bawk. Bahama pawhin Africa ram pathum aṭangin an rama zin luh a khap ve dawn bawk a ni.

Canada public health agency chuan Canada khua leh tui, tun hnaia Ebola hri lenna rama zinte chu symptom nei lo pawh ni 21 chhung dah hran an ni dawn tih a sawi a ni. US, Canada leh Bahamas ramah hian Ebola hri vei hi hmuh chhuah an la awm lo. Hetih lai hian Ebola hri len ṭanna, DR Congo-a Ituri province-ah chuan hri leng venna tur leh, hri kaite enkawlna tur hmanrua leh damdawite an nei ṭha tawk lo hle, governor Johnny Luboya Nkashama chuan hri leng chu an tan indona hmachhawn ang mai an nih thu a sawi. Rang taka hma an lak a ngaih thu sawiin, chhiatna nasa zawk a thlen lohna turin health lam thawktu dah belhte a ṭul tih a sawi. Official-te chuan May 15-a Ebola hri a leng tih puan a nih hnuah, hri kai hi mi 900 chuang an tlin tawh bawkah thihpui mi 223 an awm tawh tih an sawi.

World Health Organisation (WHO) chuan Ebola hri chu a tir a an lo rin lawk aiin a darh chak maithei tih a sawi. WHO chuan he hri leng vang hian public health emergency a lo puang tawh bawk. Tun kar tir lam khan WHO director-general Tedros Adhanom Ghebreyesus chuan DR Congo hi a tlawh a ni.