Zimbabwe ramah malaria vei an pung

Zimbabwe ramah US-in an ram chhawmdawlna tur sum a pek a tihtawpin malaria control programme a nghawng avangin malaria hri vei leh thihpui an pung nasa hle.

Kum 2025-a US president Donald Trump-a'n a president term hnihna a chelh aṭang khana, US chuan United States Agency for International Development (USAID) hnuaia foreign aid funding a pekte a titawp a ni. Hei hian Zimbabwe ram a nghawng hle a, TB, HIV/AIDS leh malaria do leh enkawlna hna kalpui mekten an tuar nasa hle. USAID hian kum 2024 khan Zimbabwe tan health and agriculture programme kalpuina turin USD mtd 270 a pe a, mahse, nikum aṭangin ṭanpuina sum an hmuh tak loh avangin an hnathawh in a tuar nasa a ni.

Kumin January aṭanga April thla thleng khan malaria vei hi mi 65,399 an tling. Hei hi nikum hetiang huna kai aiin 36,000 an tam zawk tih Zimbabwe Ministry of Health National Malaria Control Programme report chuan a tarlang. Malaria vanga thi pawh an pung nasa a, January -April chhungin mi 174 an thi. Nikuma hetiang hun chhunga malaria hri vanga thi chu mi 85 niin kum 2024 khan mi 34 an thi.

US aṭanga puihna sum an dawn ṭhin tihtawp a nih tak avangin malaria do hna kalpuina leh, a hri kaite enkawlna kawngah harsatna nasa tak an tawk a ni. Sorkar leh an thawhpui dangte chuan theih angin hma la mah se, an mamawh zat sum an hmuh loh avangin chak taka kalpui theih a nih tawh lo. Thosi len leh test kit hrang hrang pawh an indaih lo hle. Damdawi, damdawi hmanrua leh thosi tihremna tur hmanruate hi ram dangin an pekah an innghah avangin, an ram dinhmun chu a ngaihtuahawm hle.

Expert-te chuan sik leh sa inthlak danglam nasa chuan malaria bakah vector-borne disease dangte chu a tihdarh chak phah bawk niin an sawi. Kum 2025 leh 2026-ah ruahtui tla a tam a, hei hian thosi pawh an pian tam phah a ni. Zimbabwe hian Africa Union-in target a siamna hnuaiah kum 2030 ah an ram aṭanga malaria hri umbo an tum a; mahse, hemi atana an hmalakna hrang hrang chu US fund tihtawp a nih tak avangin a bahlah phah nasa hle a ni.