US leh Iran-in inkahhai puan pawhsei remti; President Trump-a'n a la pawmpui lo

United States leh Iran chuan inkahhai pawhsei a, Strait of Hormuz-a lawng kaltlang turte laka khuakhirhna siam hlih an remti nia report a ni. Mahse, inremna siam hi US president Donald Trump-a'n a la pawmpui lo tih tarlan a ni bawk.

Ram pahnihte hian inkahhai chu ni 60 pawhsei a, Hormuz Strait-a lawng pawh dan pangngai anga kal tlangtir an remti a ni. Ni 30 chhungin Iran-in tui hnuaia 'mine' a kamte chu a thianfai ang a, US Navy-ten Iran port an dansak pawh tihtawp an remti a ni. Hemi chhung hian Iran nuclear programme chungchanga inhriatthiam lohna an neihte chingfel tura inbiakna neih chhunzawm turin an ti a ni.

Inremna siam hi US leh Iran hruaituten an pawm ve ve a nih chuan, February 28-a indona a thlen hnua boruak muanawm a awm theihna atana an hmalakna lian ber a ni ang. Hetih lai hian Trump chuan a la pawmpui loh bakah, Iran lam pawhin hemi chungchangah hian sawi an la nei lo. Mahse, US vice president JD Vance chuan inremna ziah fel la ni chiah lo mah se, an tifel hnai tawh hle niin Ningani zan khan a sawi.