IS hotu thar Abu Ibrahim al-Hashimi al-Qurayshi

Islamic State (IS) firfiak pawl chuan an pawl hotu thar atan Abu Ibrahim al-Hashimi al-Qurayshi ruat a nih thu a puang.

Ningani khan IS thu­puangtu thar, Abu Hamza al-Qurayshi chuan audio statement siamin, an hotu hlui Abu Bakr al-Baghdadi a thi tih chu a nemnghet a, a thih hnu hian IS thuneitu sang chuan meeting nei nghalin a thlaktu atan  Abu Ibrahim al-Hashimi al-Qurayshi ruat a ni tih a sawi bawk. 

IS te audio tihchhuah hi minute 7 bawr vel a ni a, an hotu thar Qurayshi chanchin kimchang erawh an tarlang lo. Mahse Qurayshi hi zawlnei Muhammad a thlahte zing ami a nih thu an sawi thung. Baghdadi thih hnu lawk khan IS thupuangtu, Abul-Hasan al-Muhajir pawh US sipaite beihpui thlakna karah thah a nih thu tarlan a ni bawk.

Audio kaltlang hian IS chuan US an vau zui nghal a,  Baghdadi thih vangin US chu lawm nghal mai lo tura an tih bakah, Europe leh West Africa ram ringawt chu beih an tum ber a nih loh thu leh, khawchhak aṭanga khawthlang thlenga an inzar pharh tawh thu an sawi.

Pathianni khan Baghdadi thih thu hi US President Donald Trump chuan khawvel hriatah a puang a ni.