Spain-in UN climate summit thlen inhuam

Spain prime minister Pedro Sanchez chuan an ram khawpui Madrid-ah United Nations' 25th Sessions of the Conference of the Parties (COP25) climate change summit thlen an inhuam thu a sawi.

UN COP25 climate change summit hi Chile-a nghah tura tih ni mah se Chilean president Sebastian Pinera chuan an ramchhungah tualchhung buaina a awm avangin an thleng thei dawn lo tih a sawi hnu lawkah Pedro Sanchez chuan thlen an inhuam thu a sawi a ni.

United Nations climate change summit hi December 2 aṭanga 13 thleng neih tura ruahman a ni a, Spain dilna hi karleh hian UN climate change panel chuan a ngaihtuah ang. COP25 hi United Nations Framework Convention on Climate Change formal meeting a ni a, Spain hotute pawh hian thlen an inhuam chungchang hi COP25 thuneitute leh UN hotute hnen an thlen tawh a ni.

Chile ram buaina hi subway fare man tihsan a nih vanga irhchhuak a ni a, heihian buaina lian zawk a hringchhuakin mi 20-in an thihphah tawh a ni. Pinera pawh hian a cabinet minister-te chu a thlak kual hial tawh bawk.