Iraq President-in Inthlan buatsaih thuai tiam

Iraq president Barham Salih chuan election law thar pass a nih veleh an ram inthlanpui buatsaih a tiam. Hemi rual hian prime minister Adel Abdul Mahdi pawhin amah thlaktu tur an awm chuan prime minister 

aṭanga ban pawh a hnial lo tih President chuan a sawi bawk. 

Iraq-ah hian an ram economy siamṭhat phutin, mipuiten hun eng emaw chen sorkar laka lungawi lohna an lantir tawh a ni. Nawrh huaihawtnaa buaina chhuakah mi 200 chuang an thi tawh a, Baghdad khawpuiah chuan kar kalta Zirtawpni aṭang khan curfew puan a ni bawk a ni. 

President Salih chuan PM hian party-ten an ram danpui zulzuia amah thlaktu tur ruat chungchangah inremna an siam thei a nih chuan banna thehluh a inhuam thu a sawi a ni, a ti. Party hrang hrang hotute a kawm kual thu leh, an ram him­na vawnhim zelna dan siamṭhat tur chungchangte a sawipui thu a tarlang bawk. 

Karleh hian Parliament-ah electoral law thar hi pharh a ni dawn tih Pre­sident chuan a sawi. Bagh­dad khawpuiah chuan sorkar laka lungawi lohna lantir chhunzawm reng a la ni. Nawrh huaihawtte chuan sorkar official pahnih khat ban emaw, thlak emaw an duh lo a, sorkar thar an duh tih an sawi.