Pakistan PM Imran Khan bang turin phut

Pakistan-a Jamiat Ulema Islam-Fazl (JUI-F) party chuan sorkar laka lungawi lohna lantirin, prime minister Imran Khan chu bang turin an phut.

PM Imran Khan bang tura an phut chhan hi an ram economy tlakchhiat vang leh nikuma inthlanna an neih tak kha a felfai tawk loh vang tih an sawi. JUI-F chief Fazl-ur-Rehman chuan "Kan ram economy an tihchhiat avangin, sorkar hian a thuneihna chu mipuite hnenah a hlan let leh tur a ni," tiin a sawi. Nawrh huaihawtte hi Karachi aṭanga kawng zawhin, ni nga chhung kawng an zawh a, nimin piah khan an khawpui Islamabad an thleng a ni.

Eptu pawl lian pahnih Pakistan Muslim League-Nawaz (PML-N) leh Pakistan People's Party (PPP)-te chuan JUI-F party hmalakna hi an thlawp bakah, nikum inthlannaah khan thil fel tawk lo a awm niin an sawi ve bawk. Jamiat Ulema Islam-Fazl party leh a thlawptute hian flag dum leh var inpawlh chu vaiin, truck chungah loudspeaker hmangin sorkar auh elna thute an tichhuak. 

Kar kalta khan JUI-F leader Hafiz Hamdullah chu Pakistan sorkar chuan a man a, JUI-F party volunteer wing Ansar ul-Islam chu sorkar hian terrorist organisation-ah a puang zui bawk a ni. JUI-F party-te chuan Pakistan sorkar hmalakna hi court-ah an khing let a ni.