Malayasia-in kum 16 hnuai lam tana social media khapna hmang ṭan

Malaysia ram chuan nimin aṭang khan kum 16 hnuai lam tana social media account neih khapna dan a hmang ṭan a ni. He dan hnuaiah hian social media platform hrang hrangah age-verification system hman a ni dawn a, kum 16 hnuai lam chu account an siam phalsak a ni dawn lo.

Khapna dan hmanna tur hian Facebook, Instagram, TikTok leh YouTube te pawh a tel dawn a ni. Social media company, kaihhruaina dan thar siam awm lote chu ringgit mtd 10 (USD mtd 2.5) thleng chawitir theih an ni ang.

Malaysia sorkar chuan khapna dan an siam hi naupangte online content ṭha lo leh cyberbullying laka venna tur a ni tih an sawi. Australia, Brazil leh Indonesia ramte chuan naupangte tana social media khapna leh khuahkhirhna hi an lo siam tawh bawk. Ram dang - Britain, France, Spain, Denmark, Thailand leh South Korea pawhin hma lak dan tur an zirchiang mek bawk.

Malaysia Communications and Multimedia Commission chuan dan an siam chu naupangten internet leh digital technology an hman tir loh tumna a ni lo a, service provider-te hnena online lama thil ṭha lo leh naupangte tana him tawk lo awmte ngaihven ṭha tura nawrna leh, naupangte tan an kum ang mil zela him tura siamtir tura nawrna a ni tih a sawi. Hei hian online environment-ah naupangte venhimna a tichak thei dawn tih a tarlang.