US paper plant-a chemical bua vanga thi mi 11 an tling

US-a kar liam taa paper plant-a chemical bua vanga thi chu mi 11 an tling tih thuneituten an sawi. Chhan chhuah hna thawktute chuan chin hriat loha awm mi pakua ruang an hmuh chhuah belh leh a ni.

Kar liam ta Thawhlehni khan Longview, Washington state-a paper factory-ah chemical thawk na tak, white liquor gallon sing chuang awmna tanky chu puakin, chemical chu nasa takin a baw zui a ni.White liquor hi alkaline solution chak tak, sodium hydroxide leh sodium sulfide chawhpawlh a ni a; thing nawi (wood chips) tihsawp nan leh lehkha siamna hmanrua 'pulp' siam nana hman a ni. Chhiatna thlen hnu hian a thawktute zawn hna pawh kalpui nghal a ni a, ruang pahnih hmuin mi pakua chu chin hriat lohin an awm. Mahse, Inrinni khan mi pakuate ruang hi an hmu ta tih an sawi.

Chhiatna thlenna hmun hi Japan Nippon Paper Group hnuaia peng pakhat, Nippon Dynawave Packaging Company factorya ni a, zing lama hnathawktu inthlak kual hun laia thleng a ni. An website-a an tarlan danin, an company hian kumtin vawi khat hman thil dahna, single-serve container hi kumtin tld 8 siam chhuakin, hengte hi North America, Asia leh khawvel hmun dangah an thawn chhuak ṭhin a ni.