United Nations Security Council-in Israel chet dan duh lohna resolution ngaihtuah

United Nations Security Council chuan Israel sorkarin Palestinian ram a luah, East Jerusalem-a Juda-te chenna tur in a sak sak
ṭhin titawp nghal tura phutna, draft resolution siam chu ngaihtuahin vote lak a ni.

Egypt chuan Nilaini zan khan draft hi thawndarhin, nimin tlai khan UNSC-ah hian vote lak a ni.

Israel-in Palestinian ram a luahah Juda-te chenna in a sak hi international law kalh a ni tiin ramdangte chuan an sawi a, hei hian Israel leh Palestinian inkara inremna siam tura hmalakna a dal niin an sawi bawk.

Palestinian hian kum 1967 indo ṭuma Israel-in a ram a laksak, West Bank, Gaza leh East Jerusalem-ah te hian independent state din a duh a ni.

UN chuan dan kalha Juda-te chenna in sak chu titawp turin Israel hi a nawr fo a, mahseUN official-te chuan tun hnaiah in hi sak belh zel a ni tih an sawi.

UNSC-a resolution hi pass tur chuan a thlawptu lamah vote pakua hmuh tlin a ngaih bakah, permanent member US, France, Russia, Britain leh China-teín an veto an hman loh a ngai a ni. Tun ṭuma resolution an siam ang hi kum 2011 khan siama lo ni tawh a, mahse US-in a veto hmangin a lo hnawl a ni.

UN-a Israel ambassador Danny Dannon chuan resolution chuan remna siamna kawnga hmalaknaah hmasawnna engmah a thlen loh tur thu a sawi a, resolution chu pass a nih chuan Palestinian policy ṭha lo leh firfiaka chetna a tihluar zawk dawn a ni, a ti. Israel dodalna resolution siam chu US chuan tlang tir a remtih loh ngei a beisei thu a sawi bawk.