Khawvel Lawrkhawm

US Secretary of State hnenah chawimawina sang hlan

France ram chuan US Secretary of State John Kerry chu remna leh muanna a awm theih tura a thawhrimna avangin chawimawina sang, Legion díHonneur a hlan.

Kar kalta Inrinni khan Paris-ah John Kerry hnenah chawimawina hi hlan a ni a, France Foreign Minister Jean-March Ayrault chuan US hruaitu muanna a awm theih nana chawl loa hna thawktu a ni, a ti. Kerry-a nu leh a nutei hi Paris-a piang an ni a, a naupan lai pawhin Saint-Brignac-sur-Mer-ah chawlh a hmang fo ṭhin.

US-in Syria-ah sipai 200 tirh belh dawn

US chuan Syria rama Islamic State (IS) firfiakte laka beihpui a thlak mekah America sipai 200 a tirh belh dawn.

Pentagon chuan thuchhuah siamin, Syria rama sipai a tirh belh turte hi special operation force, trainer, adviser leh explosive ordinance disposal team an ni tih a sawi. Syria ramah hian US sipai 300 an awm sa a, an ni hian IS nena inbei mek, Syria sipai leh tualchhung pawl hrang hrangte training an pe ṭhin.

France PM tharin emergency pawhsei a duh

France Prime Minister thar Bernard Cazeneuve chuan an rama state of emergency puan mek chu nakkum July 15 thleng pawtsei turin Parliament-ah a dil.

Nikum November 13-a firfiakten Paris khawpui an beih hnu khan emergency hi puan a ni. Cazeneuve chuan nakkumah an ram president thlan leh inthlanpui an neih dawn vangin ram himna chu ngaihtuah a ngai hle tih a sawi. Inthlan vuakvetah politics thila punkhawmte a tam dawn avangin an ram himna tichhe duhtute tan beihna remchang a tam phah dawn a, hei vang hian emergency chu pawhsei a ngai a ni, a ti. Parliament chua a dilna hi tunkarah a ngaihtuah ang.