Istanbul-a football stadium bulah bomb puak

Turkey rama khawpui lian ber, Istanbul-a Besiktas football stadium bulah kar kalta Inrinni zan khan bomb a puak a, mi 29 an thi a, mi dang 166 in hliam an tuar.

Inrinni zana bomb puak hi car bomb leh thihchilh bomb a ni a, pawikhawihtute hian police-te an bitum niin official-te chuan an sawi.

Besiktas home stadium-a top-division team, Besiktas leh Bursaspor team-te inkhelh zawh hnu darkar hnih hnu velah bomb hi a puak a ni. Inkhel entute hi an haw darh hman avangin chhiatna nasa zawk a thlen loh phah nia sawi a ni.

Pawikhawihna thleng kaihhnawihah hian mi 10 man an ni tawh a, nimin khan ram pumah bomb puak vanga thite sunna hun hman a ni bawk. Eng pawl mahin bomb tipuaktu an nih thu hi an la sawi lo.

President Recep Tayypi Erdogan chuan firfiakten an ram security force leh mipui tam takte tawrhtir tumin pawikhawihna an thlen thu a sawi a, he thila mawhphurtute chu zawnchhuah ngei an nih tur thu leh, hremna na tak pek an nih tur thu a sawi.

Kumin hian Turkey ramah pawikhawihna lian a thleng fo

20 August :

Gaziantep-a inneih lawmna hmunah bomb tihpuah a ni a, mi 30 an thi. Bomb tipuaktu hi Islamic State (IS) firfiak pawl nia puh an ni.

30 July :

Kurdish fighter-te’n Turkish sipai hmunpui luhkhung an tum a, sipaite nen hian inkapin, Kurdish firfiak mi 35 an kap hlum.

29 June :

Istanbul-a Ataturk airport chu silai leh bomb hmanga beih a ni a, mi 41 an thi. IS-te tih nia puh a ni.

13 March :

Kurdish helten Ankara-ah thihchilh bomb a tipuak a, mi 37 an thi.

17 February :

Ankara-ah military convoy beih a ni a, mi 28 an thi.