Nigeria-a biak-in chimah mi 60 an thi

Nigeria chhim lam, Akwa Ibom state khawpui Uyo-ah biak-in a chim a, mi 60 chuang an thi.

Kar kalta Inrinni-a biak-in chim hi Reigners Bible Church International building a ni. Biak-in hi sak mek a ni a, Inrinni khan an kohhran dintu Akan Weeks chu bishop atan nemnghet a ni a, mi tam tak an inkhawm a ni.

Inkhawm neih laiin biak-in hi a chim a, a chung chim chuan mi tam tak a delh a ni. He inkhawmah hian state governor Udom Emmanuel pawh a tel a, mahse him takin a chhuak a ni. State sorkar chuan thuchhuah siamin, in chim chhan chhui chiangtu tur panel of inquirydin nghal a ni tih a sawi.

In chimin a delhte chhanchhuah hna hi Julius Berger Construction Company, police, army, Fire Service, Nigeria Security and Civil Defense Corps, Nigerian Medical Association leh Federal Road Safety Corps-ten an thawk nghal a ni. Ruang 60 lakchhuah an ni tawh a, thi zat hi an punchhoh rin a ni. State Governor thupuangtu, Ekerete Udoh chuan building sak danah thil fel tawk lo a awm em tih chhui chian a ni dawn tih a sawi.

Kum 2014 khan Nigeria-a sumdawnna hmunpui, Lagos-ah biak-in a chim tawh bawk a, mi 70 in nunna an chan a ni.