Obama’n Russia inrawlha puhna chhui chiang turin ti

US President Barack Obama chuan November 8-a US President thlanna neihah khan, Republican Party candidate Donald Trump a chak theih nana Russia a inrawlh nia puhna chu chhui chiang turin thupek a tichhuak.

White House chuan hemi chungchang hi sawi chhuakin, President chuan Intelligence Community hnenah kumin inthlan kalpui a nih dan kimchang chu chhui chiang turin a ti a ni, a ti. White House Homeland Security and Counter-terrorism Adviser Lisa Monaco chuan thil chhui chungchang chu mipuite hnenah a theih anga puanzar zel a nih tur thu a sawi bawk.

US President thlannah neih zawh takah khan thil fel tawk lo a awm nia sawi a nih avangin CIA chuan a chhui a, Donald Trump a tlin theih nan Russia sorkar chu a inrawlh ngei niin Washington Post chuan a tarlang. Inthlan hma, October thla khan Russia sorakar chu inrawlh lo tura hriattir a lo ni tawh a, President Barack Obama pawhin Russia President Vladimir Putin-a hnenah Democratic Party bei lo turin alo hriattir tawh bawk.

Hetihlai hian Russia chuan inrawlha an puhna chu a pha thung a, America hnenah pawh an puhna finfiahna pe turin vawi tam tak a hrilh a, mahse chhanna engmah an dawng lo niin Russia Foreign Ministry thupuangtu Maria Zakharova chuan a sawi.