Khawvel Lawrkhawm

Pakistan-in ISI hotu thar tur a ruat

Pakistan chuan Inter-Services Intelligence agency (ISI) hotu thar atan Lt Gen Naveed Mukhtar a ruat a, Lt Gen Rizawn Akhtar a thlak dawn a ni.

ISI hotu hi Pakistan rama post pawimawh ber zing ami a ni. Agency hi Pakistan ṭhenawm ramte beitu, Islamist firfiakte thawhpuiah puh an lo ni fo tawh a, hei bakah hian Afghan Taliban leh firfiak dangte hum ṭhinah puh an ni bawk. ISI hotu thar Mukhtar hi Karachi-ah corps commander a ni ṭhin a, hemi hma hian Islamabad-ah awmin ISI counter-terrorism wing hotu a ni tawh bawk.

Oxford zirlaiten ‘ze’ tih hmang dawn

Khawvela zirna in ṭha ber zinga mi, Oxford University chuan zirlaite tan inkaihhruaina thar siamin, an zirlai puite sawina atana mipa leh hmeichhia thliarhranna, ëheí leh ësheí tih hmang loa ëzeí tih hmang turin a ti.

University thuneitute chuan zirlai zinga mahni nihna thlak thleng (transgender) te chungchanga ṭawngkam dik lo hman a nih ṭhin venna atan gender neutral pronoun hi hman turin a siam ta a ni. Hei hi Cambridge University-ah pawh hman tum a ni bawk. Oxford behaviour code-ah chuan transgender-te sawinaa pronoun dik lo hman chu thil sual anga ngaih a nih tawh bawk.

Khawvela tunnel sei ber hmang tan

Khawvela tunnel sei ber, Pollegio, Switzerland-ah chuan Pathianni aṭang khan rel service ṭan tir a ni ta.

Km 57-a thui, Gotthard Base Tunnel (GBT) hi June thla khan hawn alo ni tawh a, mahse Pathianni aṭang khan hman ṭan a ni chauh. Swiss Alps hnuaia lei verh hna hi kum 17 chhung thawh a ni a, a siam nan hian Swiss frans tluklehdingawn 12 ( US dollar tluklehdingawn 11.8) sen a ni.