IS-in Palmyra khua la let

Islamic State (IS) firfiak pawl chuan Syria rama khawpui pawimawh, Palmyra chu Pathianni khan Syria sipaite kut aṭangin an la let leh.

Kum 2015, May thla khan IS hian Palmyra khua hi sipaite kut aṭanga lain an awp zui a, mahse kumin March 27 khan Russia puihna nen Syria sipaite chuan he khuaa firfiak awmte chu an umchhuak a ni. Mahse kar kalta Ningani aṭang khan firfiakte hian beihpui thlak thar lehin, Palmyra khawchhungah an lut leh a, Pathianni khan khawpui chhunga hmun pawimawhte chu an la kir leh a ni.

Russia defence ministry chuan Palmyra khua lak let tuma beihpui thlaknaah
ṭum 64 zet khawpuia firfiakte hmun an bomb a, firfiak 300 chuang an thi niin a sawi.

Palmyra hi khawpui pawimawh, hmanlai thil hlu tam tak awmna hmun a ni a, Unesco World Heritage site-ah puan a ni bawk. Mahse firfiakten khawpui an awp hnu hian hmanlai thil hlui tam tak an tichhia a, heng zingah hian kum 2,000-upa temple pahnih leh tower-te pawh a tel.

Palmyra khawpui lak let tuma firfiakten an beihnaah hian Syria sipai 120 chuang an thi a, sipaite hi Palmyra chhim lama thlalerah an inthiarfihlim a ni. Homs governor Talal Barazi pawhin sipaite chu khaw chhung aṭanga an chhuah tawh thu a sawi. Hetihlai hian thlawhtheihna hmangin Russia leh Syria sipaite chuan IS hmun pawimawhte chu an beih chhunzawm reng a ni.