Donald Trump-a’n CIA report a hnawl

US President-elect Donald Trump chuan President thlanna neih zawh taka a tlin theih nana Russia a inrawlh nia CIA report tarlan chu a pawm loh thu a sawi.

Fox News-in a kawmnaah he thu hi sawiin, Democrats lam chuan inthlana an chak loh em avangin chhuanlam tur an zawng kual niin Trump chuan a sawi. Russia official-te pawhin CIA report hi an pawm loh thu an sawi tawh bawk.

CIA chuan Russia hian Democratic Party email leh, an party candidate Hillary Clinton-i thawhpui hnai tak email khawihsakin, WikiLeaks hnenah a pe a, an ni hian inthlan dawn hnaihah online-ah a tichhuak niin chanchinbu-ah tarlan a ni. Democrats chuan email chungchang Russia-in a tharthawh leh hian Clinton-i dinhmun a pawhhniam phah hle niin an sawi a ni. Russia hian Republican party email pawh an khawihsak a, mahse mipui hmuh turin an puangzar duh lo niin report chuan a tarlang bawk.

Trump chuan CIA report chungchang chanchinbua tihchhuah a nih danah Democrats lam an inrawlh niin a puh. Republican party thupuangtu Sean Spicer pawhin an party email chu khawih sak an nih loh thu leh, intelligence report tarlan chu a dik lo thu a sawi ve bawk.