Biak-in beih vangin Egypt mipuite lungawi lo

Egypt khawpui, Cairo-a Coptic Kristian biak-in bulah bomb a puak a, mi 25 an thi. Thi zinga a tam zawk hi hmeichhia leh naupang an ni.

Bomb puahna hmun hi St Markís Cathedral a ni a, bomb puak hian biak-ina hmeichhia-te inkhawmna hall a tichhia a ni. Hall tukverh leh bungruate a chhe nasa hle.

He thil thleng duh lo hian Pathianni zan khan Kristian leh Muslim tam tak chu St Markís Cathedral kawtah an pungkhawm nghal a, interior minister Magdy Abdel Ghaffar chu an ram mipuite venghim zo loah puhin, President Abdel Fattah el-Sisi chu a minister hi ban nghal turin an phut.

Lungawi lohna lantira pungkhawmte chuan Ministry of Interior chuan biak-in pawh a venghim thei lo a, hei vang hian an mahnin venhim hna an thawh a ngai dawn ta niin an sawi. Biak-in veng tura security guard dahte chu an inthlahdah a, an hna thawk loin internet an khawih nileng ṭhin niin an sawi.

President office chuan pawikhawihna thleng hi a dem thu a sawi a, biak-in beihnaa thi te chu ram pumah ni thum chhung sun an nih tur thu leh, pawikhawihtute chu man chhuah ngei an nih tur thu a sawi.

Biak-in beitu an nih thu hi eng pawl mahin an la sawi lo a, mahse Islamic State (IS) chuan social media lamah biak-in beih hi an lo lawm thung.