Russia-in Ukraine khawpui hrang hrang bei

Russia chuan Thawhṭanni zan leh nimin zing khan Ukraine khawpui hrang hrang a bei leh a, mi 10 an thih bakah hliam tuar eng emaw zat an awm.

Official-te chuan Russia beihna avang hian Dnipro khuaah mi paruk an thi a, hliam tuar 36 awmin Kyiv khawpuiah mi pali an thih bakah hliam 52 an awm tih an sawi.

Kyiv mayor Vitali Klitschko chuan khawpui chhunga high-rise apartment pahnih an kap fuh tih sawiin, in chim hnuaiah mi eng emaw zat an tang tih a sawi. In chim hnuaia tangte chhan chhuah hna hi thawh nghal a ni.

Russia chuan kar liam ta khan Ukraine-in Russia kuta awm, Luhanska bial drone hmanga a beihnaah mi 21 an thih avangin Ukraine hi a bei let dawn tih a lo sawi tawh a ni. Klitscho chuan mipuite chu pawn chhuak lo turin a chah a, nimin zing thleng khan drone kah chhuah a la nih vangin Kyiv bakah khawpui hrang hrangah warning tih rik a ni bawk.

Russia beihna avang hian gas station, construction site leh apartment block hrang hrangah kangmei a chhuak a, Ilsky Oil Refinery pawh a kang tel a,Zaprizhzhia-a industrial facility pawh an bei tel bawk a ni.