Kenya-a America mi tan Ebola quarantine centre siam; Tualchhung miten lungawi lohna an lantir

US-in Kenya rama Nanyuki khuaa Laikipia Air Base-a America mi, Ebola hri kaite tana quarantine centre a siam chu tualchhung miten duh loin, Thawhṭanni khan lungawi lohna an lantir.

Kenya High Court chuan hemi chungchanga Law Society of Kenya leh constitution watchdog-in thubuai an theh luh ngaihtuahin, facility siam hi titawp turin a hmain a lo hriattir tawh a, America mi Ebola hri kai pawh an rama lut lo turin a lo ti tawh bawk. Pawl pahnihte chuan an ram health system chak tawk loh dante ngaihtuahin, ram dang mi Ebola veite dah khawmna atana hman chu a chi loh hle tih an sawi.

Kar liam ta khan US official-te chuan America mi, ram danga an zin chhuahnaa Ebola hri kaite chu US-ah hruai haw lo a, Kenya rama Ebola quarantine centre an siamah dah hmasak zel an tum thu an puang a ni. He hmunah hian hri kai 50 awm theihna tur siam a ni dawn tih an sawi a ni.

Thawhṭannia tualchhung mi lungawi lohna lantirte hian quarantine centre siamna, air base bulah kawng an zawh a ni. Hetih lai hain health minister Aden Duale chuan quarantine centre hi America mite tan chauh ni lo, Kenya mite tan pawh hman a ni dawn tih a sawi thung. US secretary of state Marco Rubio chuan Kenya ramin Ebola hri laka invenna tura a hmalaknaah US chuan USD mtd 13.5 a pek tur thu a sawi tawh bawk.

Kenya ramah hian Ebola hri kai hmuh chhuah an la awm lo a; mahse a ṭhenawm Uganda ramah hri kai hi pakua an awm tawh.