Indonesia President-in free meals scheme hotu a ban

Indonesia president Prabowo Subianto chuan a flagship free meals programme kalpuitu, National Nutrition Agency hotu, Dadan Hindayana chu food poisoning thleng leh eirua puh a nih avangin a ban.

Free meals scheme atan hian dollar maktaduai tel dah a ni a, kum 2024-a president thlan dawna Prabowo campaign au hla ber a ni. He scheme hnuaiah hian an rama sikul naupang mtd 80 te chu ei tur a thlawna pek an ni. Nikum January thla aṭang khan scheme hi kalpui ṭan a ni a, mahse scheme kalpui hnuah ei tur an sem chhuah eitu naupang sing tel chuan an dam loh phah a ni. Hei vang hian agency hotu ban tura phutna pawh a nasa hle.

Food poisoning thleng leh, ei tur siamna atana sum pek chhuah danah eirukna nasa tak a awm nia sawi a nih hnuah corruption watchdog chuan complaint an theh lut a ni. President ngei pawh hi an ram sum dinhmun tlahniam mek karah he programme atana sum tam tham tak dah a nih avang hian sawisel pawh hlawh phah bawk.

Iran war avanga an ram sum dinhmun thlengin a tawrh hnuah, naupangte hnena a thlawna ei tur sem ṭhin hi kar khata ni ruk tih chu ni ngaah tihtlem a ni tawh bawk a ni. Hetih lai hian he programme tihtawp rih duh hi tam tak an awm.

Attorney General Office official-te chuan nimin zing kha National Nutrition Agency office an dap a, staff-te pawh building-a an luh tur an lo dang a ni. Agency hotu, Dadan thlak tur hian a deputy, journalist hlui leh Prabowo campaign team member Nanik Sudaryati Deyangg chu ruat nghal a ni.