NKorea-in parade-ah missile thar pho chhuak

North Korea chuan rorellai, Workers' Party Congress zawh lawmna atana Pyongyang-a Ningani zana military parade a buatsaihah submarine-launched ballistic missile (SLBM) a neih thar a pho chhuak. 

State news agency KNCA chuan, "Khawvela ralthuam hlauhawm ber, submarine-launch ballistic missile chu pho chhuah a ni a, hengte hian sipaite chakna leh theihna san zia a rawn lantir a ni," a ti. Parade-a SLBM pho chhuah hi Pukguksong-5 niin state media-te chuan an tarlang. Hei hi nikum October thlaa military parade neihnaa pho lan, Pukguksong-4 upgrade a ni. 

Ningani zana military parade neih hi nikum October thla hnua parade an neih leh pui ber a ni a, NKorea hotu Kim Jong-Un pawhin  Kim Il Sung Square podium aṭangin parade hi a lo thlir a, thu erawh a sawi lo thung. Tun ṭum parade-a hian October parade-a pho lan, US ram khawi hmun pawh kap pha thei tura ngaih, intercontinental ballistic missiles (ICBMs) erawh pho chhuah tel a ni tawh lo thung. 

Kar liam taa Workers' Party member-te hmaa thu a sawiah, Kim chuan an ram  nuclear weapon leh sipai chakna chu thuam chakna zel a tum thu a sawi a, ralthuam an mamawh tur angte pawh sawilangin, heng zingah hian khawmual leh tuipui aṭanga kahchhuah thei, long-range ballistic missile a duh thute pawh a sawilang a ni. US chu an ram hmelma lian ber a ni reng tih sawiin, "Tupawhin thuneihna chang mah se, NKorea laka an policy chu a danglam chuang lo a ni," a ti. Hemi hnu lawk, Ningani zana military parade pui tham tak buatsaih a ni ta pawh hi January 20-a US President thar atana lakluh mai tur, Joe Biden laka an chakna lantirna atana buatsaih nia rin a ni.