Indonesia-ah magnitude 6.2-a nain lir a nghing

Indonesia-a Sulawesi island-ah nimin zing khan magnitude 6.2-a nain a lir a nghing a, lirnghingin chhiatna a thlenah mi 34 an thi a, mi 600 chuangin hliam an tuar bawk. 

Lir  nghin ṭanna hi Majene khawpui hmarchhak lam km 6-a hla, lei hnuai km 10-a thukah a ni. Majene khuaa damdawi-in chu lirnghing hian a sawi chim a, in chim hnuaiah hian dam lo enkawl lai leh thawktu eng emaw zat an tang a, heng mite chhanchhuah hna hi thawh nghal a ni. Mamuju-ah mi 26 an thi a, disaster mitigation agency  hotu Ali Rahman chuan in chimin a delh mi tam tak an la awm a, heng mite dinhmun hi hriat theih a la ni lo a, thi zat pawh hi an la pun chhoh a rin thu a sawi. Sulwesi khawthlang lamah mi pariat an thi bawk. 

Pacific 'ring of fire' Indonesia ram hi lirnghing na tak takin a nuai fo. Kum 2018 khan Sulawesi hmarlama Palu khuaah magnitude 6.2-a naa lir nghinin, tsunami a thleng zui a, mi sang tel an thi a ni. Kum 2004 December thla khan Indonesia hmar lam, Sumatra island-ah magnitude 9.1-a nain lir a nghing a, tsunami na tak thlengin mi nuai 2.3 chuangin an lo thih phah tawh bawk a ni.