Khawvel Lawrkhawm

Cuba-in internet chak zawk neihna tur inremna ziak

Cuba sorkar chuan an ramin internet connection chak zawk an neih theihna turin Google chu inremna a ziahpui.

Sorkar enkawl telecommunications company, Etecsa chuan Google hi inremna a ziahpui a, an inremna hnuaiah hian Google chuan Cuba-ah Google service, Gmail leh YouTube speed tihchakna turin server an dah dawn a ni. Cuba hi khawvela online connection nei tlem ram zingah a la tel a, mipui tam zawkin in
aṭangin internet an khawih thei lo a, online turin man to takin wi-fi point an hman a ngai a ni.

China-in NKorea atanga coal lakluh titawp dawn

China Commerce Ministry chuan North Korea aṭanga coal a lakluh chu a titawp lailawk rih dawn tih a sawi. Hei hi UN Security Council-in NKorea ram hrekna a siam thar leh vang a ni.

November thla khan UN Security Council chuan NKorea chu nuclear weapon programme a kalpui chhunzawm zel avangin hrekna a siam thar leh a, NKorea-in kum khat chhunga bungrua a thawnchhuah khuahkhirhna tur a siam a ni. Coal hi NKorea-in sum a lakluhna pui ber pakhat a ni a, mahse hrekna thar siam a nih tak avangin coal a thawnchhuah aṭanga a sum lakluh chu dollar maktaduai 700 velin a tlakhniam phah dawn nia sawi a ni.

Italy PM thar la lut

Italy Prime Minister thar, Paolo Gentiloni chu Thawhṭanni zan khan lakluh a ni.

Sorkarin ram danpui siamṭhat tuma ruahmanna a siamte mipuiin an hnawl avangin Matteo Renzi chu PM aṭangin a bang a, amah thlak tur hian kum 62 mi, Gentiloni hi thlan a ni. Thawhṭanni zan khan PM thar hi President Sergio Mattarella-aín rinawmna thu a tiam tir a, tunkar chhung hian Parliament-ah approval vote lak a ni ang. Gentiloni hian a cabinet member turte a ruat nghal a, Renzi-a hnuaia minister tam zawk chu an chanvo ngai chelh tir an ni.