Jakarta Governor thubuai ngaihtuah ṭan

Indonesia khawpui, Jakarta Governor Basuki Tjahaja Purnama chu Muslim lehkhabu thianghlim, Quran zah loah puh a ni a, nimin khan a thubuai ngaihtuah ṭan a ni.

Ahok tia hriat lar, Purnama hi Kristian a ni a, kum 50 chuang hnua Jakarta-a Kristian governor ni thei hmasa ber a ni.

Nimina Governor thubuai ngaihtuah a nih lai hian court pawn lamah amah dodaltu leh thlawptu mi tam tak an pungkhawm a, venghimtu ṭhahnem tham tak duty tir an ni. Judge panga awmna panel-in a thubuai hi an ngaihtuah dawn a, Quran sawichhiaa puhna thubuaiah hian thiam loh chantir a nih chuan kum nga thleng lung-in tantir theih a ni ang.

Indonesia hi Muslim ram a ni a, Muslim sakhaw sawi≠chhiat khapna dan khauh tak an nei. A ram mipui, mi maktaduai 220 zingah 90% chu Muslim sakhaw zuitu an ni.

Governor Purnama hian September thla khan Jakarta governor thlanna neih tura a campaign-naah, Quran thuchang lachhuakin dik lo takin a sawichhuak nia puh a ni. Hei hian Muslim mi tam tak a tithinur a, a lakah lung≠awi lohna lantirin vawi tam tak kawngzawh an huaihawt a, police-ah complaint an thehluh a ni bawk.

Thubuai ngaihtuahnaah hian Governor hi a ṭap nia sawi a ni a, Muslim sakhua chu a zah thu sawiin, a godparent-te pawh Muslim an ni a, inzawmna ṭha tak an neih thu a sawi. Muslim sawichhe zawnga thu a sawi loh thu leh, a thusawi chu politician ṭhenkhat, dik lo taka Quran thuchang hmang ṭhinte tana a sawi a nih thu a tarlang bawk.