Denmark cabinet tharah mipa aiin hmeichhia tam zawk

Denmark prime minister Mette Frederiksen-i chuan Nilaini khan a Cabinet thar a pho chhuak a, Denmark chanchina a vawi khatna atan cabinet tharah hian mipa aiin hmeichhia an tam zawk.

March thlaa inthlanpui neihah khan party mala sorkarna siam thei an awm lo a, hei vang hian sorkar thar siam turin hun eng emaw chen inbiakna an nei a ni. Prime Minister ni lai Frederiksen chuan Thawhṭanni khan a party Social Democrats leh Socialist People's Party, centre-left Radikale Venstre leh centrist Moderates-te thawk hoin 'minority government' a din theih thu a sawi. Nilaini khan a minister tharte a puang zui ta a ni. Social Democrats hi party mala seat la hnem ber niin parliament seat 179 awmah seat 38 an la a, mahse, kum 1903 hnua inthlanpuia an chet chhiat ber ṭum a ni. An thawhpui party dang palite belhkhawmin seat 82 an la ve bawk.

PM Frederiksen chuan a cabinet-ah hian minister 21 an awm thu leh, an zinga 11 chu hmeichhia an nih thu sawiin, mipa 10 an awm ve bawk. Moderates hruaitu, Lars Lokke Rasmussen chu foreign minister-ah dah chhunzawm a ni.