Iran-in Kuwait airport a beihnaah mi 1 thi

Iran chuan Nilaini khan drone hmangin Kuwait international airport a bei a, mi pakhat a thih bakah hliam 60 chuang an awm. Iran beihna avanga thi hi India mi a ni.

Kuwait Defence Ministry thupuangtu chuan Nilainia beihna thleng chungchangah Iran chu na taka demin, diplomatic mission hmun ṭhenkhatah chhiatna a thlen tel thu a sawi. Iran drone hian Terminal One a fuh a, airport facility pawh a chhe nasa hle tih an sawi.

Iran-a Islamic Revolution Guard Corps (IRGC) chuan he beihna hi an tih a nih thu sawiin, US-hoin Iran oil phur lawng leh Qeshm Island an beihna avanga phuba lakna a nih thu an sawi. Kuwait-a Ali Al Salem Air Base chu US-in helicopter te a dahna hmun a nih thu a sawi a, hei bakah Bahrain-a US Fifth Fleet hmunpuite chu missile leh drone hmanga an beih thu Telegram-ah an tarlang a ni.

An airport beih a nih hnuah Kuwait foreign ministry chuan an rama Iran palai pahnihte chu darkar 24 chhunga an ram chhuahsan turin a hriattir nghal a, Iran charge d'affaires pawh ko nghalin an lungawi loh thu an hrilh.

India foreign ministry pawhin Kuwait beih a ni chu a dem thu sawiin, India mi pakhat a thih bakah hliam zingah pawh India mi eng emaw zat an awm tih a sawi.

Gulf ram hrang hrang pawhin Iran chet dan chu an dem thu an sawi bawk a, UAE presidential advisor Anwar Gargash chuan Kuwait leh Bahrain beihna chu ram bil beihna ni loin, Gulf ram pum bitumna anga an ngaih thu a sawi a ni. Gulf ramte chu inpumkhat taka an din a pawimawh thu a sawi bawk.