San Diego-ah Cocaine tam tham tak man

San Diego county sheriff chuan kar liam ta khan cocaine kg 1000 chuang an man tih US attorney office for the southern district of California chuan a tarlang. Hemi kaihhnawihah hian mi pali; Mexican 2 leh American 2 man ni tawh a, thiamlohchantir an nih chuan damchhung lung in tang tura hrem theih an ni.

San Diego, California-ah hian Mexico ram atangin ruilhlo a rawn lut nasa hle a, a tawlhtute hi cartel chi hrang hrang niin, motor bakah leiverh hmang telin ruihhlo an tawlh thin. Tun ṭuma cocaine an man pawh hi, ramri kan tum motor an endik atanga hmuhchhuah niin, cocaine kg 1000 chuang lai an man.

Cocaine man a nih hnuah hian ramri bula dawr pakhat ‘Buy 4 Less’ tih hmingpu luhchhuah niin, ruihhlo tawlhna atana hman leiverh thui tak hmuhchhuah a ni bawk. He leiverh hi ft 4.5 a sang niin, US lamah ft 1000 laia sei a ni a, Mexico lamah ft 800 vela sei nia rin a ni. Homeland Security Investigation chuan nikum lam daih tawh aṭang khan helai hmunah hian ruihhlo tawlhna tura siam leiverh hi a awm ngeia ngaiin an lo thlitlai reng tawh a, kar liam taa ruihhlo tam tham tak an man tak hnuchhui kal zelah leiverh hi an hmuchhuak ta a ni.

HSI San Diego Special Agent Kevin Murphy chuan an ruihhlo mante hi Jalisco New Generation cartel ta a nih thu sawiin, an ruihhlo tlawhna kalkawng pawimawh tak leiverh hmuhchhuah a ni hian nasa takin an operation a ti ṭhuanawp dawn tih a sawi. Cocaine tam tham tak man a ni hian Homeland Security Investigation leh Homeland Security Task Force te inpekna thutzia leh thawhhona ṭhat zia a tilang chiang hle a ni, a ti bawk.

Leiverh hmuhchhuah hi kum 2022 hnua California chhhim lama leiverh hmuhchhuah lehna hmasa ber a ni a, kum 1993 hnuah hetiang ruihhlo tawlhna atana hman leiverh hi 99 lai an lo hmuchhuak tawh tih US attorney office chuan a tarlang.