CBX: Cross Border Express Bihchianna

San Diego, US leh Tijuana, Mexico thlun zawmtu CBX hi hmasawnna danglam bik, khawvel hmun danga awm ve lo a nih avangin a chanchin hi sawi tham a tling a ni. CBX hi ft 390-a sei lei (bridge) niin, US leh Mexico ramri hungna border wall tan tlangin lei dawh a ni a, Tijuana International Airport aṭanga thlawk chhuak leh lutte’n awlsam zawka US leh Mexico rama an veivah theih nana duan a ni. CBX terminal hi US ram lamah sak a ni a, ramri kanin lei dawh niin Tijuanna international airport,Mexico ramah a lut a ni.

CBX express hi zinmite Tijuana Airport-a thlawk lut leh chhuakte tan chauh hmang thei a ni a, chutiang ticket nei lo tan chuan airport dang ang bawkin luh theih a ni lo. US aṭanga zin turte chuan CBX terminal aṭanga hian lutin custom leh immigration te an paltlang vek hnuah lei chu zawhin Mexico ramah lutin airport departure hall an thleng thei a ni. Lei hi US lam atanga dawh niin, Tijuana international airport ah a lut a, security paltlang tur ṭum thum lai a awm avangin ramri kanna hmun dang aiin a him zawkah hlea ngaih a ni.

Sak a ni dan

CBX hi sorkar ta ni loin mimal ta a ni a, kum 2008 aṭanga tawh khan terminal sak tumna hi a lo awm ṭan tawh a ni. Kum 4 lai Mexico leh US sorkar dawr tawn a nih hnuah, ramri paltlanga sak tur a nih avangin ‘Presidential Permit’ pek a ni a, kum 2012 a/angin an sa ṭan theih chauh a ni.US leh Mexico sorkar hi ramri chungchangah inhmuhfuh chiah lohna an neih fo avangin leh inlaichinna ṭha tak an neih hran loh avangin hetianga ramri kana lei sak mai theih a ni hi a hunlai pawh khan sawi a hlawhin mi tam tak mak tih pawh a ni hial. Ramri bang kaltlanga lei dawh anih avangin venhimna pawh uluk taka kalpui a ni a, US Border Patrol te chuan helai ramri venhimna hna hi thawkin, an hnathawhna tura an senso zawng zawng hi CBX lam hian an tum thung a ni.

Kum 2015-a hman ṭan a nih pawh khan a hmangtu mipui an tam an ring lo hle a, amaherawhchu rinlawk aia tamin he terminal hi an hmang mek a ni. Tijuanna airport pawh CBX express a awm hnu hian kumtin 14% lain a ṭhang belh reng a ni. Kum 2015 hmalamah chuan airport hi 2% chiahin a ṭhang thin a, thlawhna pawh ni khata 22 thlawk chhuak thin kha tunah chuan nitin 40 a thlawk chhuak ta ziah a ni.

Engvangin nge US ah airport a ve reng laia CBX express hmangtu an tam em em kan tih chuan, California state chhunga airport te hi a lunin traffic avangin airport pan hi a hautak hle a, khawchhung traffic tawta inhawh ai chuan highway-ah kalin CBX terminal pan mai hi mi tam takin an tlang zawk fo a ni. Chutiang anih vang chuan CBX hi San Diego state-a awm mah nise, California chunga khawpui dang San Bernardino, Santa Ana, Orange County leh Los Angeles a/angtein an pan nasa em em a ni. Hei bakah hian a chunga khawpui kan sawi takte aṭanga thlawh chhuah aiin Tijuana airport a/anga thlawh chhuah hi 40% lain a tlawm zawk bawk. Tin, Tijuana International airport hi khawvel huap pawhin airport lun berte zinga mi a ni a, hemi airport aṭang hian ram hrang hrang tlawhluh theihna a tam hle.